قسطرة المخ

أشهر شريان بيوصل الدم للمخ هو الشريان السباتي. ولو حضرتك أو حضرتك حطّيتوا إيديكم على الرقبة من قدّام، هتحسوا بنبض قوي… ده نبض الشريان السباتي. الشريان ده طالع بصورة مباشرة من القلب، وظيفته الأساسية إنه يوصّل الدم للمخ. والمخ هو أهم عضو في جسم الإنسان، وأكتر عضو شغال ليل ونهار ومحتاج لوصول مستمر للغذاء والأكسجين. علشان كده أي مرض أو مشكلة بتحصل في الشريان السباتي… تأثيرها بيروح مباشرة على المخ.

مع مرور الوقت وتقدّم السن، أو مع أمراض منتشرة جدًا زي ارتفاع ضغط الدم، مرض السكر، زيادة الدهون في الدم، أو حتى مع بعض العادات السيئة زي التدخين… الجدار الداخلي بتاع الشريان السباتي بيبدأ يحصل له تغييرات. الدهون بتبتدي تترسب على الجدار، ومعاها تكلسات بسيطة، ومع الوقت القطر الداخلي للشريان بيقل. وأشهر نقطة بيتأثر فيها الشريان السباتي هي مدخل الشريان نفسه — بداية الشريان — ودي أكتر منطقة بتجمع الدهون والترسبات.

الضيق اللي بيحصل ده مش مجرد رقم أو صورة على الأشعة… ده ضيق بيأثر على أهم عضو في الجسم. المخ لو ما وصلوش دم كفاية، بيبتدي يدخل في مرحلة خطر. وهنا تظهر جلطة المخ. والجلطة ببساطة شديدة هي إن الدم مش قادر يوصل للمخ بالشكل الكافي، وده بيعمل أعراض ومضاعفات ممكن تكون خطيرة جدًا لو ما اتلحّقتش.

في الصور اللي معانا في هذا الموضوع:

– في الصورة الأولى: هتشوفوا ضيق واضح جدًا في بداية الشريان السباتي.

– في الصورة الثانية: وهي نفس الصورة، أنا مظلّل باللون الأصفر الترسّبات الدهنية اللي عاملة الضيق… لما تشوفوها كده هتفهموا بالعين الموضوع ماشي إزاي.

– وفي الصورة الأخيرة: ده شكل الشريان بعد تركيب الدعامة… الشريان اتفتح، والضيق اختفى تقريبًا، والدم رجع يتدفّق للمخ بصورة ممتازة.

علاج ضيق الشريان السباتي النهارده ما بقاش عملية جراحية كبيرة زي زمان. بقيت قسطرة دقيقة، نفس فكرة قسطرة شرايين القلب. إحنا بندخل أنبوبة رفيعة جدًا من خلال شريان الفخذ، ونمشي بيها تحت الأشعة لحد ما نوصل للشريان السباتي. بعدها بنحقن صبغة طبية بتبيّن الضيق وشكله وحجمه. ومع المعلومات دي بنركّب دعامة خاصة جدًا اسمها دعامة الشريان السباتي. الدعامة دي بتوسع الشريان وترجع قطره الطبيعي، وبتسمح للدم إنه يوصل للمخ بشكل سليم.

بعد تركيب الدعامة، المريض بيحتاج يمشي على أدوية سيولة لمدة تقريبة حوالي سنة، وده طبعًا بيختلف من مريض للتاني حسب صحته وحسب تقييم الطبيب.

من الناحية العلمية والإحصائية، عملية توسيع الشريان السباتي بالدعامة تعتبر من أنجح وأأمن الإجراءات الطبية. نسبة الأمان بتتجاوز 96–97٪‏، ودي نسبة نجاح عالية جدًا مقارنة بعمليات كتير في الطب.

الهدف الأول والأخير من علاج ضيق الشريان السباتي هو حماية المخ… وحماية حياة المريض قبل أي شيء.

كان معكم

دكتور مصطفى فريد

استشاري الأشعة التداخلية وعلاج أمراض شرايين المخ