التمددات الشريانية في المخ من أخطر المشكلات اللي ممكن تواجه الإنسان. التمدد الشرياني ببساطة هو نقطة ضعف في جدار الشريان تؤدي لانتفاخه بطريقة تشبه البالونة. المشكلة الكبيرة إن الجدار في المكان ده بيكون أضعف من الطبيعي، وبالتالي قابل للتمزّق في أي لحظة، خصوصاً لو حجم التمدد كبير. وده اللي بيخلّي التمددات الكبيرة أكثر خطورة… لأنها أكثر عُرضة للانفجار وحدوث نزيف مخي مميت لا قدّر الله.
عشان كده، علاج التمددات الشريانية في الوقت المناسب مهم جداً. إحنا بنعالجها إما عن طريق الملفات الحلزونية (Coils) أو عن طريق الدعامات المخصّصة للمخ، أو بنستخدم الاثنين مع بعض حسب حجم التمدد وشكله وطبيعته. معظم الحالات لما بتتعالج بتكون النتائج ممتازة… لكن ما ينفعش أبداً نهمل المتابعة.
ليه؟
لأن في نسبة من المرضى — بعض الدراسات بتقول حوالي ٢٠–٢٥٪ — ممكن يحصل عندهم إعادة فتح للتمدد أو نمو جزء جديد منه بعد العلاج. وده بيحصل لأن الشريان في المكان ده أصلاً ضعيف، فممكن يحصل شوية حركة بسيطة في الملفات الحلزونية لأعلى أو لأسفل، أو يحصل نمو جديد في جزء كان مقفول… وبالتالي التمدد يتفتح تاني.
وده بالظبط اللي حصل في الحالة اللي بنتكلم عنها هنا.
المريض كان عنده تمدد شرياني كبير في المخ. تم علاج التمدد بالملفات الحلزونية ودعامة مخية، والنتيجة وقتها كانت ممتازة. وبعد ست شهور رجعنا عملنا المتابعة بالقسطرة — ودي خطوة أساسية — ولاحظنا إن جزء صغير من التمدد رجع ظهر من جديد.
في الصورة الأولى:
السهم الأصفر 🟡 بيشاور على الملفات الحلزونية القديمة.
والأسهم الحمراء 🔴 بتوضح الجزء اللي حصل فيه نمو جديد.
الجزء ده ما ينفعش يتساب.
لأن أي حجم، حتى لو صغير، ممكن مع الوقت يكبر… وممكن يعرّض المريض لنفس الخطر اللي عالجناه من البداية.
عشان كده كان لازم نتدخل تاني، ونعالجه بأسلوب أقوى وأكثر أماناً.
رجعنا دخلنا ملفات حلزونية إضافية لحد ما قفلنا كل جزء من التمدد. وفي الصورة التانية، الأسهم الصفراء 🟡 بتبيّن إن التمدد بالكامل بقى مقفول بإحكام.
لكن ما اكتفناش بكده…
استخدمنا كمان دعامة كثيفة جداً، اسمها “الدعامة المغيّرة لمسار الدم” أو Flow Diverter. ودي دعامة مميزة جداً، فتحاتها صغيرة للغاية، وظيفتها إنها تغيّر اتجاه الدم وتمنع دخوله تماماً نحو التمدد، وده بيخلّي التمدد ينكمش مع الوقت ويقفل بشكل دائم. الدعامة دي معلّم عليها بالأسهم الزرقاء 🔵. هي مش دايماً بتكون واضحة في الصور، لكن لو ركزتوا هتشوفوها.
الحمد لله العملية نجحت نجاح كبير. والمريض خرج من المستشفى تاني يوم، بصحة ممتازة وحالة مستقرة جداً.
وهنتابعه بعد ست شهور مرة كمان… لكن بإذن الله، وبوجود الملفات والدعامة المغيّرة لمسار الدم، مش متوقعين يحصل أي إعادة فتح للتمدد.
وده مثال واضح ليه المتابعة بعد علاج التمدد الشرياني مهمة زي العلاج نفسه.
وليه التدخل في الوقت المناسب ممكن ينقذ حياة كاملة.
شكراً لحضراتكم.
قسطرة المخ 